Kumusta ka?

Nagliliyab pa ba ang apoy,

Pagmamahal at pagsisilbi,

Sa bayan, sa kabataan?

Naaalala mo pa ba

Kung saan nagmula

Ang bunga ng pighati

Bitbit mo bilang tugon

Sa landas na tinatahak?

May halaga pa ba

Ang bawat pagsindi ng apoy

Sa tuwing ito’y namamatay

Sa ihip ng hangin

Mula sa kinakalawang na Makinarya?

Kumusta na?

Ipagpapagtuloy pa rin ba

Ang mga hakbang na sinimulan

Para sa bayan, para sa kabataan?

 

Tahan.

 

Tumahan ka at ilawan

Ang madilim na daan,

Magsilbing liwanag,

Sa mga nasa karimlan.

Tumahan ka at kumapit,

Sa bawat saysay at puwang,

Para humakbang,

Para sumulong.

Tumahan ka at pakinggan

Ang huni ng bawat hakbang

Patungo sa tunay na diwa

Ng pag-ibig at paglilingkod

Para sa bayan, para sa kabataan.